அக்டோபர்31

👉 சர்தார் வல்லபாய் படேல் பிறந்த தினம்

👉 இந்திரா காந்தி நினைவு தினம்

👉 தேசிய ஒற்றுமை தினம்

---

🌷 2003ஆம் ஆண்டு அக்டோபர் 31ஆம் தேதி இந்திய கர்நாடக இசைப் பாடகர் செம்மாங்குடி ஸ்ரீநிவாச ஐயர் மறைந்தார்.

🌷 1931ஆம் ஆண்டு அக்டோபர் 31ஆம் தேதி தமிழின் முதல் பேசும் படம் காளிதாஸ் வெளியிடப்பட்டது.

🌷 1924ஆம் ஆண்டு அக்டோபர் 31ஆம் தேதி உலக சேமிப்பு நாள், இத்தாலியின் மிலானோ நகரில் சேமிப்பு வங்கிகளின் உலக அமைப்பினால் அறிவிக்கப்பட்டது.

---

உலக சிக்கன தினம்
🌺 சர்வதேச சேமிப்பு வங்கிகளின் சிக்கன மாநாடு 1924ஆம் ஆண்டு இத்தாலியின் மிலான் நகரில் நடைபெற்றது. உலகின் பல சேமிப்பு வங்கிகளின் பிரதிநிதிகள் கலந்துகொண்ட இம்மாநாட்டுக்குப் பிறகு மக்கள் அனைவரும் சிக்கனத்தை அறிய வேண்டுமென உலக சிக்கன தினம் என ஒரு தினம் அறிமுகப்படுத்தப்பட்டு கொண்டாடப்படுகிறது.

🌺 உலக சிக்கன தினம் ஆண்டுதோறும் அக்டோபர் மாதம் 31ம் தேதி கொண்டாடப்படுகிறது. சேமிப்பு, சிக்கனம் போன்றவைப் பற்றி மக்களுக்கு எடுத்துக்கூற வேண்டும் என்பதே இத்தினம் உருவாக்கப்பட்டதற்கு முக்கிய நோக்கமாகும்.

---

சர்தார் வல்லபாய் படேல்
🌷 இந்தியாவின் 'இரும்பு மனிதர்' என்று போற்றப்படும் சர்தார் வல்லபாய் படேல் 1875ஆம் ஆண்டு அக்டோபர் 31ஆம் தேதி குஜராத்தில் பிறந்தார்.

🌷 சர்தார் வல்லபாய் படேலின் பிறந்த நாளான அக்டோபர் 31ஆம் தேதியை ஒவ்வொரு ஆண்டும் தேசிய ஒற்றுமை தினமாக மத்திய அரசு அனுசரிக்கிறது. நம் நாட்டின் ஒற்றுமைக்கும், ஒருமைப்பாட்டிற்கும், பாதுகாப்பிற்கும் அச்சுறுத்தலாக அமையும் விஷயங்களை எதிர்த்து நிற்கவும், நமக்குள் இருக்கும் உள்ளார்ந்த வலிமையை, எதிர்த்து நிற்கும் திறனை உறுதி செய்ய, இந்நாள் கடைபிடிக்கப்படுகிறது.

🌷 அகமதாபாத்தில் தன் வக்கீல் தொழில் மூலம் உள்ளூர் மக்களின் பிரச்சனைகளுக்கு உதவி, பிரபலமானார். 1917ம் ஆண்டு அகமதாபாத் மாநகராட்சி தேர்தலில் வெற்றி பெற்றார். சுதந்திர இந்தியாவின் முதல் உள்துறை அமைச்சராகவும், துணைப் பிரதமராகவும் பணியாற்றினார்.

🌷 சுதந்திரப் போராட்டத்தின் சிப்பாய் என்று அழைக்கப்பட்ட இவர் 75வது வயதில் (1950) மறைந்தார். 1991-ல் படேலுக்கு பாரத ரத்னா விருது வழங்கப்பட்டது.

---

இந்திரா காந்தி
🌷 இந்தியாவின் துணிச்சல்மிக்க பெண்மணி இந்திரா காந்தி 1917ஆம் ஆண்டு, நவம்பர் 19ஆம் தேதி அலகாபாத்தில் பிறந்தார். இவர் இந்தியாவின் முதல் பிரதமரான ஜவகர்லால் நேருவின் மகள் ஆவார்.

🌷 1966ஆம் ஆண்டு ஜனவரி மாதம் முதல் 1977ஆம் ஆண்டு மார்ச் மாதம் வரை இந்தியாவின் பிரதமர் பொறுப்பை ஏற்றார். மத்திய தகவல் ஒலிபரப்புத்துறை அமைச்சர், மத்திய அணுசக்தி துறை அமைச்சர், மத்திய வெளியுறவுத்துறை அமைச்சர், மத்திய உள்துறை அமைச்சர், மத்திய விண்வெளித்துறை அமைச்சர் என பல்வேறு பதவிகளை வகித்துள்ளார்.

🌷 1980ஆம் ஆண்டு ஜனவரி மாதம் 14ஆம் தேதி முதல் மீண்டும் பிரதமராகப் பதவி ஏற்றுக்கொண்டார். இந்தியாவின் விடுதலைக்காக தன்னை இணைத்துக்கொண்டு வாழ்ந்த அன்னை இந்திரா காந்தி, 1984ஆம் ஆண்டு, அக்டோபர் மாதம் 31ஆம் தேதி தன்னுடைய 66வது வயதில் மறைந்தார்.

---